Manifiesto a favor d’a obchección de consciencia y d’a deserción en Rusia y en Ucraína

Somos qui entre los zaguers decenios d’o sieglo XX y prencipios d’o sieglo XXI participemos en a campanya antimilitarista contra lo Servicio Militar Obligatorio y la Prestación Substitutoria en o Reino d’Espanya. Estiemos decenas de mils de personas, emparadas per millons, en una mobilización popular historica que conquirió lo dreito a la obchección de consciencia y que acabó con a servidumbre vergüenyosa d’a «mili». Una comunidat desobedient y antipatriarcal que s’enfrontinó a lo reclutamiento forzoso, a mils de chudicios, a la persecución y a la garchola; y que se sostenió gracias a l’apoyo mutuo y, en gran mida, a la luita d’as mullers antimilitaristas. Ahiere, como hue, reivindicamos la insemisión a la guerra, y una humanidat liberada de l’autoritarismo y d’os exercitos. Luitemos alavez, y luitamos agora, contra totas las inchusticias que provocan las guerras y per la eliminación d’as suyas causas.

Entre que los Estaus adornan la barbarie d’a guerra con a suya propaganda patriotica, insistimos en o dreito universal a renunciar a las armas y a que las personas decidan librement lo suyo destín. Dengún habría de veyer-se obligau a trigar entre la uno y l’atro costau d’o matadero.

Lo Gubierno ucrainés ha establiu lo reclutamiento forzoso pa los hombres d’entre 18 y 60 anyos, convertindo en clandestinos a mils de chovens y adultos que se niegan a combatir, y a los quals las bandas paramilitars aturan en controls de carretera y a la salida d’as ciudatz. Lo Gubierno ruso enganya y coacciona a los soldaus pa que no abandonen las unidatz d’a suya armada. La Unión Europea niega asilo politico a los desertors de totz dos bandos, ninvia armas a la zona y anuncia l’incremento d’o suyo presupuesto militar. La guerra accelera la crisi enerchetica y medioambiental global, y menaza encara mas la economía d’as personas vulnerables y d’os países empobrius.

Mos negamos a obedeixer pasivament sin ufrir resistencia. Mos negamos a compadeixer a las victimas d’as guerras sin protestar. Refusamos la masculinidat forchada en a figura y lo mito d’o guerrero, la colonización patriarcal de as nuestras ments y cuerpos. No queremos convertir-mos en sers nocivos y periglosos, capables de cometer tota mena de rebaixadas y maltratos. No queremos estar complices d’a violencia sexual contra mullers de totas las edatz, ni de l’asesinato de personas chicotas, enfermas u mayors indefensas. Las solucions que cheneran mas violencia perpetúan la dominación.

• EXICHIMOS lo cese d’a invasión rusa, la retirada d’as tropas d’ocupación, y lo respecto a la voluntat de qui viven en as diferents zonas d’Ucraína pa decidir lo suyo futuro en libertat, respectando los dreitos de totas las minorías.

• EXICHIMOS que la Unión Europea y lo Reino d’Espanya en particlar accepten las demandas d’asilo de qui desertan d’a guerra u fuyen d’o reclutamiento obligatorio, d’acuerdo a lo dreito universal a la obchección de consciencia. Matar en una guerra no ye un «deber civico».

• EXICHIMOS que la Unión Europea aculla sin restriccions a totas las personas que viengan fuyindo de qualsequier guerra que i haiga en o mundo. Refusamos lo racismo y la crueldat d’as buegas.

• EXICHIMOS que cese lo ninvio d’armas y tropas de países d’a OTAN a la zona, lo desmantelamiento d’os paraísos fiscals an emblanquen los suyos beneficios las industrias d’armamento y las oligarquías europeas, y la desmilitarización d’o conficto. Los crimens de guerra anteriors de qualsequiera d’as partes no chustifican garra intervención sangrienta mas: chitar mas lenya a lo fuego no ye la solución.

• ANIMAMOS a las poblacions civils d’os territorios en guerra a resistir-se a l’odio social, y a apoyar a los soldaus y desertors que se nieguen a participar en a fricasera.

• APOYAMOS a qui en Ucraína y Rusia s’autoorganizan con fins pacificas, emplegan medios de luita incruentos, practican la desobediencia civil y la defensa noviolenta, y pateixen la represión politica per oposar-se a la guerra; en especial, a los movimientos antimilitaristas y feministas d’ixas tierras.

• CLAMAMOS a organizar un ret europeu d’apoyo a pacifistas y desertors que desobedeixcan a la guerra en Ucraína y que pateixcan persecución politica.

• DESOBEDEIXEREMOS las leis espanyolas y europeas las vegadas que calga, pa acullir en as casas nuestras a pacifistas y desertors de Rusia y Ucraína. Acabar con totas las guerras ye acabar con a dictadura d’o sistema economico capitalista que las provoca y se beneficia d’ellas. S’entivocan qui creyen que prolargar esta guerra d’Ucraína, que tien os antecedents mas cercanos se remontan a 2014, trayerá bell tipo de beneficio pa dengún: nomás servirá pa producir mas sufrimiento y pa alimentar lo fascismo en totz los rincons d’a planeta.