Manifiestu a favor de la oxeción de conciencia y de la deserción en Rusia y n’Ucraína
Somos quien a lo llargo de les últimes décades del sieglu XX y primeros del sieglu XXI participemos na campaña antimilitarista contra’l Serviciu Militar Obligatoriu y la Prestación Sustitutoria nel Reinu d’España. Fomos decenes de miles de persones, sofitaes por millones, nuna movilización popular histórica que conquistó’l derechu a la oxeción de conciencia y qu’acabó col serviciu vergonzosu de la «mili». Una comunidá desobediente y antipatriarcal que s’enfrentó al reclutamientu forzosu, a milenta xuicios, a la persecución y a la cárcel; y que se caltuvo gracies al sofitu mutuu y, en bona midida, a la llucha de les muyeres antimilitaristes. Ayeri, como güei, reivindicamos la insumisión a la guerra, y una humanidá lliberada del autoritarismu y de los exércitos. Lluchemos entós, y lluchamos agora, contra toles inxusticies que provoquen les guerres y pola eliminación de les sos causes.
Mentes los Estaos adornen la barbarie de la guerra cola so propaganda patriótica, aneciamos nel derechu universal a arrenunciar a les armes y a que les persones decidan llibremente’l so destín. Naide se tenía que ver obligáu a escoyer ente ún y otru llau del mataderu.
El Gobiernu ucraín estableció’l reclutamientu forciáu pa los homes d’ente 18 y 60 años, convirtiendo en clandestinos a miles de mozos y adultos que se nieguen a lluchar, y a los que les bandes paramilitares detienen en controles de carretera y a la salida de les ciudaes. El Gobiernu rusu engaña y coacciona a los soldaos pa que nun abandonen les files de la so armada. La Unión Europea niega asilu políticu a los desertores de dambos bandos, unvia armes a la zona y anuncia l’aumentu del so presupuestu militar. La guerra acelera la crisis enerxética y medioambiental global, y amenaza entá más la economía de les persones vulnerables y de los países emprobecíos.
Negámonos a obedecer pasivamente ensin poner resistencia. Negámonos a tener duelu de les víctimes de les guerres ensin protestar. Refugamos la masculinidá forxada na figura y el mitu del guerreru, la colonización patriarcal de les nuestres mentes y cuerpos. Nun queremos convertinos en seres dañibles y peligrosos, capaces a cometer toa clas d’humildaciones y maltratos. Nun queremos ser cómplices de la violencia sexual contra muyeres de toles edaes, nin del asesinatu de persones pequeñes, enfermes o mayores indefenses. Les soluciones que xeneren más violencia perpetúen la dominación.
ESIXIMOS el cese de la invasión rusa, la retirada de les tropes d’ocupación, y el respetu a la voluntá de quien viven nes distintes zones d’Ucraína pa decidir el so futuru en llibertá, respetando los derechos de toles minoríes.
ESIXIMOS que la Unión Europea, y el Reinu d’España en particular, acepten los pidimientos d’asilu de quien desierten de la guerra o fuxen del reclutamientu obligatoriu, d’alcuerdu al derechu universal a la oxeción de conciencia. Matar nuna guerra nun ye un «deber cívicu».
ESIXIMOS que la Unión Europea acueya ensin restricciones a toles persones que vengan fuxendo de cualquier guerra qu’haya nel mundu. Refugamos el racismu y la crueldá de les fronteres.
ESIXIMOS qu’apare l’unviu d’armes y tropes de países de la OTAN a la zona, l’esmantelamientu de los paraísos fiscales onde blanquien los sos beneficios les industries d’armamentu y les oligarquíes europees, y la desmilitarización del conflictu. Los crímenes de guerra anteriores de cualquiera de les partes nun xustifiquen nenguna intervención sangrienta más: echar más lleña al fueu nun ye la solución.
ANIMAMOS a les poblaciones civiles de los territorios en guerra a resistise al odiu social, y a sofitar a los soldaos y desertores que se nieguen a participar na matanza.
SOFITAMOS a quien n’Ucraína y Rusia s’autoorganicen con fines pacíficos, usen medios de llucha incruentos, practiquen la desobediencia civil y la defensa non violenta, y sufren la represión política por oponese a la guerra; sobre manera, a los movimientos antimilitarista y feminista d’aquelles tierres.
LLAMAMOS a entamar una rede europea de sofitu a pacifistes y desertores que desobedezan a la guerra n’Ucraína y que sufran persecución política.
VAMOS DESOBEDECER les lleis españoles y europees les veces que faiga falta, p’acoyer nes nuestres cases a pacifistes y desertores de Rusia y Ucraína.
Acabar con toles guerres ye acabar cola dictadura del sistema económicu capitalista que les provoca y se beneficia d’elles. Equivóquense quien creen qu’allargar esta guerra d’Ucraína, que tien los antecedentes más averaos nel 2014, va trayer dalgún tipu de beneficiu pa naide: namás va valir pa producir más sufrimientu y p’alimentar el fascismu en tolos requexos del planeta.